هذيك السهاري

نقدم لكم قصيده جديده

لشاعر المتالق : عمر الفاخري

( الاربد )




ما اقدرت ننسى هذيك السهاري ,, وكويات ناري ,, منه غلا اللي اعيونه غداري


ما اقدرت ننسى هذيك الاماسي ,, وجرعات كاسي ,, منه غلا بو غثيتن امواسي


هالب احزامه و لامع اكداسي ,, مايح غماري ,, هلّي اعيونه امدرج ابحاري


امجوّع وجله عليها المحاسي ,, كم من حباري ,, جابها مذابيح فوق الحماري


ننساه نابى ايجدّن افراسي ,, جديده افكاري ,, وترقى امعايا اتشيّط افناري


ما اقدرت ننسى هذيك السهاري ,, وكويات ناري ,, منه غلا اللي اعيونه غداري


ما اقدرت نا ننسى هذيك الهدارز ,, امحصل وحارز ,, فوزه على الجيل تمّا البارز



شوفه اللي ابسرج فجّر وطارز ,, ديره وجاري ,, افميزه تمثل ذات السواري


وسيعن انهاجه 16 حارز ,, منه لمهاري ,, عاتي عريض الكفل ولوخاري


ما اقدرت ننسى وماشي فارز ,, وراحن اجباري ., اماير طريقه وخربات داري


ما اقدرت ننسي هذيك السهاري ,, وكويات ناري ,, منه غلا اللي اعيونه غداري


ما اقدرت ننسى هذيك الليالي ,, عـ القلب غالي ,, تناغيم صوته ايملن الخالي


كيف لمزان اللي في الليالي ,, ايجيبن امطاري ,, اتروي عقاير تنبت خضاري


سيلهن تماصى بين لجبالي ,, ودارن مجاري ,, الــ شرايين قلبي وقلب امواري


واليوم نبكي ويا لال لالي ,, ويلي اكثاري ,, ادموعي ونوحي وياويل جاري


ما اقدرت ننسى هذيك السهاري ,, وكويات ناري ,, منه غلا اللي اعيونه غداري



ما اقدرت ننسى هذيك الجلاوي ,, وننسى الحكاوي ,, اللي من اقواله اعيون النداوي


زول بو مصّره وشوفه الخاوي ,, شلوق لي الشاري ,, بعديده ورتعه سقنّها جواري


حليب الشوايل تملى ابرغاوي ,, وعلفه شكاري ,, شعير من الغرفه و عبي غراري


اعيون من ايبوّع مثيل التباوي ,, اتقول له ثاري ,, مع الخرب خارم وجابه شطاري


علي غيبت والمطيرات باوي ,, انتاجهن غباري ,, امّحقن وحطيت عني المداري


ما اقدرت ننسى هذيك السهاري ,, وكويات ناري ,, منه غلا اللي اعيونه غداري


ما اقدرت ننسى هذيك ليام ,, ايام انسجام ,, ايامن ونا افمنتهاه الغرام


واليوم تما اقليبي احطام ,, وجيهت ايساري ,, اقريب شللها ويا نار ناري


غنيت ابغريري هوينا الحمام ,, اطاير اطياري ,, عليها ونسيت شقيت طاري


درته عزايا ابروحي وسلام ,, وحتى اجواري ,, ما يندروبي وما حد داري


ما اقدرت ننسى هذيك السهاري ,, وكويات ناري ,, منه غلا اللي اعيونه غداري